გოგონა, რომელიც სანქტ-პეტერბურგში ტერაქტის დროს დაიღუპა ბოლნისიდანაა

სანქტ-პეტერბურგის მეტროში მომხდარ აფეთქებას 21 წლის აზერბაიჯანელი სტუდენტი დილბარა სამანდაროვნა ალიევა ემსხვერპლა. როგორც გაზეთი ბოლნისისთვის გახდა ცნობილი, გარდაცვლილი ახალგაზრდის მშობლები ბოლნისის მუნიციპალიტეტის, სოფელ ტალავერიდან არიან. ოჯახი წლებია აზერბაიჯანის დედაქალაქში ცხოვრობს და შესაბამისად გარდაცვლილი ბაქოში დაკრძალეს.

რუსული გამოცემა „ეხო მოსკვის“ მიერ გამოქვეყნებულ სიაში მისი სახელი თავიდან მითითებული იყო, როგორც – ალიევა ტამარა. ახალგაზრდა ქალი 3 აპრილს მძიმე მდგომარეობაში მიიყვანეს ჯანელიძის სახელობის სასწრაფო დახმარების საავადმყოფოში, სადაც ის 4-ში დილით გონზე მოუსვლელად გარდაიცვალა.

jam-news.net– ის ინფორმაციით სანქტ-პეტერბურგში აზერბაიჯანის გენერალურმა კონსულმა სულთან ჰასიმოვმა ეს ინფორმაცია დაადასტურა. „ ალიევას გარდაცვალების შესახებ ინფორმაცია ამ დილით მივიღეთ. ამჟამად ჩვენი თანამშრომლები საავადმყოფოში იმყოფებიან“, – ციტირებს ჰასიმოვის სტყვებს სააგენტო АПА-ს რუსეთის ბიურო.

გენერალურმა კონსულმა დასძინა, რომ მეტროში დაჭრილ მოქალაქეებს შორის არის კიდევ ერთი აზერბაიჯანელი – ზაურ ველიევი. ამჟამად მისი ჯანმრთელობის მდგომარეობა სტაბილურია, ის საავადმყოფოში იმყოფება.

წყარო:bolnisi.ge ; imedi.ge