პარლამენტარ ირაკლი ხახუბიას შვილის, 21 წლის ბექა ხახუბიას გარდაცვალებაში პატრულს ადანაშაულებენ. ამის შესახებ Facebook-ზე "რეფორმირების ცენტრის" ხელმძღვანელმა ზვიად კუპრავამ სტატუსი გამოაქვეყნა. მისი თქმით, ბექა ხახუბია ნასვამ მდგომარეობაში, ავტომობილით თბილისიდან დასავლეთ საქართველოს მიმართულებით მიდიოდა, რა დროსაც მას გორთან დაედევნა საპატრულო პოლიციის ეკიპაჟი.
პატრულმა მას მანქანის გაჩერება მოსთხოვა, მაგრამ ხახუბია მართვის მოწმობის ჩამორთმევის შიშით, პატრულის მოთხოვნას არ დაემორჩილა და დასხლტომის მიზნით, გადაჭარბებული სიჩქარით გააგრძელა გზა ხაშურის მიმართულებით.
"ხაშურთან, ბექა ხახუბია მიხვდა, რომ საპატრულო პოლიცია მისი დევნის შეწყვეტას არ აპირებდა და ხაშურის ცენტრში, წრესთან, მოაბრუნა მანქანა და გეზი ისევ თბილისისკენ აიღო. ამ დროს, გორის გვირაბის გასასვლელში დასვენების მიზნით გაჩერებულ სატვირთო ტრაილერის მძღოლს, გორის საპატრულო პოლიციის თანამშრომლებმა უკანონოდ ჩამოართვეს მისი კუთვნილი სატვირთო მანქანა და მოახდინეს გორის გვირაბის გასასვლელის ჩახერგვა. დიდი სისწრაფით მოძრავმა ბექა ხახუბიამ, რომელიც უკვე განათებული გვირაბიდან სიბნელეში გამოდიოდა, ვერ შეამჩნია ტრაილერი და მაქსიმალური სიჩქარით შეეჯახა მას", - წერია კუპრავას სტატუსში.
ბექა ხახუბია ადგილზევე გარდაიცვალა. კუპრავას თქმით, "ბექა ხახუბიას დევნაში მთელი გორის, ხაშურის, ქარელის და კასპის საპატრულო ეკიპაჟები იყვნენ ჩართულნი. რომლებსაც უკიდურესი აუცილებლობის შემთხვევაში, თავისუფლად შეეძლოთ ავტობანი მოციმციმე ეკიპაჟებით გადაეკეტათ, რაც ხილვადობის მანძილს მკვეთრად გაზრდიდა და შეჯახების რისკს შეამცირებდა. მაგრამ არა! ამათ ტრაილერით გადაკეტეს გზა."
ცოტა ხნის წინ, კუპრავამ კიდევ ერთი სტატუსი გამოაქვეყნა, რომელშიც წერს, რომ ბექა ხახუბიას საქმემ საპატრულო პოლიციის საგამოძიებო ნაწილიდან, პროკურატურაში გადაინაცვლა. რაც კიდევ ერთი დადასტურებაა იმის, რომ დანშაული შსს-ს თანამშრომლების მხრიდან არის ჩადენილი."
გამოძიება სისხლის სამართლის კოდექსის 276-ე მუხლის მე -5 ნაწილით მიმდინარებს. ეს მუხლი გულისხმობს ავტომობილისა და სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევას იმის მიერ, ვინც ამ სატრანსპორტო საშუალებას მართავს, რამაც ადამიანის სიცოცხლის მოსპობა გამოიწვია. ბრალის დამტკიცების შემთხვევაში, 4-დან 7 წლამდე პატიმრობაა გათვალისწინებული.
Comments
Post a Comment
მადლობა კომენტარისთვის! | TSJ GROUP Tech |