სააკაშვილი დააკავეს, თუმცა გაიქცა.

დეკემბერს დილით, უკრაინის გენერალური პროკურატურის და უსაფრთხოების სამსახურის წარმომადგენლები, კიევში, ოდესის ყოფილი გუბერნატორის, და პარტია "ახალი ძალების მოძრაობის" ლიდერის მიხეილ სააკაშვილისსახლში, ჩხრეკის ჩასატარებლად მივიდნენ. პოლიტიკოსის თანამებრძოლმა დავით საყვარელიძემ Facebook-ზე დაწერა, რომ სააკაშვილის ბინის კარს ამტვრევდნენ და მხარდამჭერებს მის სახლთან შეკრებისკენ მოუწოდა. სააგენტო Украинские новости-ს შეფასებით, მოწოდებას დაახლოებით ათასი ადამიანი გამოეხმაურა. ქუჩაში პოლიციასთან შეტაკებები დაიწყო. ტელეკომპანია 112 Украина-ს ცნობით, სააკაშვილის ერთ-ერთმა მომხრემ ბენზინი გადაისხა და თავის დაწვას შეეცადა. უკრაინის შინაგან საქმეთა სამინისტროს პრესმდივანმა არტიომ შევჩენკომ განაცხადა, რომ შეტაკებებში რამდენიმე პოლიციელი დაშავდა. სულ ცოტა 9 ადამიანი დააკავეს.



დაკავება



ჩხრეკის დაწყების შემდეგ, სააკაშვილი სახლის სახურავზე ავიდა და დაიმუქრა, რომ გადმოხტებოდა "თუ ვინმე ხელს ახლებდა". თვითმხილველების თქმით, ყოფილი გუბერნატორი სახურავიდან გაჰყვიროდა, რომ უკრაინის პრეზიდენტი პეტრო პოროშენკო - ქურდი და მოღალატეა. შემთხვევის ადგილზე გადაღებული ვედეომასალის თანახმად, ყოფილი გუბერნატორი სახურავიდან ჩამოყვანა მოხერხდა. ის სახლიდან ხელბორკილით გამოიყვანეს და მიკროავტობუსში ჩასვეს დაკითხვაზე წასაყვანად, მაგრამ მხარდამჭერების მასამ ავტომობილს გზა ჩაუკეტა. 112 Украина-ს ცნობით, პოლიციელებმა ხალხის გასაფანტად ცრემლსადენი გაზი გამოიყენეს. სააკაშვილის მხარდამჭერებმა თავის მხრივ ბარიკადების აწყობა დაიწყეს, რისთვისაც გამოიყენეს ავტომობილის საბურავები და ნაგვის ტომრები.



ბრალდებები



უკრაინის უსაფრთხოების სამსახურმა გაავრცელა განცხადება, რომელშიც ნათქვამია, რომ სააკაშვილი დაკავებულია დანაშაულებრივ დაჯგუფებებთან თანამშრომლობისა და მათი საქმიანობის დაფარვის ბრალდებით. იმავდროულად, ყოფილი გუბერნატორის ადვოკატი პაველ ბოგომაზოვი ამტკიცებს, რომ მისი კლიენტი ეჭვმიტანილია სახელმწიფოს კონსტიტუციური წესრიგის დამხობის მცდელობაში.

უკრაინული სააგენტოს ცნობით, პროკურატურა და უსაფრთხოების სამსახური იძიებენ იმ მიტინგების დაფინანსების საქმეს, რომელსაც სააკაშვილის მომხრეები კიევში ატარებენ. 2017 წლის სექტემბერიდან ისინი რეგულარულად მართავენ აქციებს და მოითხოვენ პეტრო პოროშენკოს გადადგომას.



რუსეთთან კავშირი



უკრაინის გენერალურმა პროკურორმა იური ლუცენკომ განაცხადა, რომ სააკაშვილის მხარდამჭერთა აქციები ორგანიზებულია ქვეყანაში ხელისუფლების ხელში ჩაგდების მიზნით და მათ ყოფილი პრეზიდენტის ვიქტორ იანუკოვიჩის გარემოცვის ადამიანები აფინენსებენ. ლუცენკოს თქმით, სააკაშვილმა 500 მილიონი დოლარი მიიღო უკრაინელი ბიზნესმენის სერგეი კურჩენკოსგან, რომელიც იანუკოვიჩის ოჯახის ახლობელია და უკრაინიდან რუსეთში 2014 წლის ზამთარში, ხელისუფლების შეცვლის შემდეგ გაიქცა.

გენერალური პროკურორის ვერსიით, ფულის გადაცემაში შუამავალი სააკაშვილის თანამებრძოლი სევერიონ დონღაძე იყო. ის უკრაინის დატოვების მცდელობის დროს დააკავეს. ლუცენკოს თქით, დონღაძე თავისი ნაცნობი ქალის ავტომანქანით დიდი სიჩქარით მიემართებოდა კიევიდან რუსეთის მიმართულებით. ის სახელმწიფოს ღალატშია ეჭვმიტანილი და პროკურატურა მისთვის პატიმრობის შეფარდებას მოითხოვს.

სააკაშვილი აცხადებს, რომ კურჩენკოს არ იცნობს და წესიერად არც იცის ვინ არის.



შინაპატიმრობა



უკრაინის გენერალური პროკურორის თქმით, მიხეილ სააკაშვილისთვის უწყება შინაპატიმრობას მოითხოვს, თუმცა სააკაშვილის დაკავება ამ დრომდე ვერ ხერდხება. ის უსაფრთხოების სამსახურის მიკროავტობუსში სამ საათზე მეტხანს იყო, რის შემდეგაც მომიტინგეებმა ავტომობილის კარი ჩაამტვრიეს და გაათავისუფლეს. სააკაშვილმა მხარდამჭერებს უმაღლეს რადასთან შეკრებისა და ქვეყნის პოროშენკოსა და მისი ბანდისგან გათავისუფლების პროცესის დაწყებისკენ მოუწოდა.



ძებნა



უკრაინული მედიის ცნობით, ცოტა ხნის წინ უკრაინის გენერალურმა პროკურატურამ ოდესის ყოფილ გუბერნატორზე ძებნა გამოაცხადა. მანამდე, პროკურორმა იური ლუცენკომ მიხეილ სააკაშვილს უსაფრთხოების სამსახურში ნებაყოფლობით გამოცხადებისთვის 24-საათიანი ვადა მისცა.



ექსტრადიცია



დღეს განვითარებული მოვლენების ფონზე კითხვები გაჩნდა სააკაშვილის შესაძლო ექსტრადიციაზე საქართველოში, რაზეც საქართველოს პროკურატურას უკრაინული მხარისათვის შუამდგომლობა გაგზავნილი აქვს. თბილისში განაცხადეს, რომ კიევში მიმდინარე მოვლენებთან დაკავშირებით, უკრაინის გენერალური პროკურატურისგან ინფორმაცია არ მიუღიათ. თავის მხრივ, იური ლუცენკომ, უკრაინის დედაქალაქში გამართულ პრესკონფერენციაზე დღეს თქვა, რომ ამ ეტაპზე სააკაშვილის დეპორტაციის ან მისი ექსტრადიციის საკითხი არ განიხილება.
Imedinews.ge