რუსულ პროექტში საქართველოსთან ერთად ოკუპირებული აფხაზეთი და სამხრეთ ოსეთი მონაწილეობენ

რუსულ მუსიკალურ პროექტში საქართველოსთან ერთად ოკუპირებული რეგიონები აფხაზეთი და სამხრეთ ოსეთი მონაწილეობს.

ტელეშოუ «Ты супер!» НТВ-ს ეთერში გადის. საქართველოს კონკურსში 12 წლის ნანა ვარძელაშვილი წარადგენს. 16 წლის არინა გაბარაევა სამხრეთ ოსეთის წარმომადგენელია, 11 წლის ვალერია ადლეიბა კი - აფხაზეთის.

ტელეკომპანიის საიტზე მითითებული ინფორმაციის თანახმად, ადლეიბას ოცნება აფხაზეთის სახელით ევროვიზიის კონკურსში მონაწილეობაა.

«Ты супер!»-ში მონაწილეობს უკრაინის წარმომადგენელიც. ერთ-ერთი კონკურსანტის შემთხვევაში კი ქვეყნის ნაცვლად მითითებულია „ლუგანსკი“.

მუსიკალური პროექტის მონაწილეები ბავშვთა სახლების, სკოლა-ინტერნატებისა და მიმღები ოჯახების ბავშვები არიან. შესარჩევი კონკურსი საქართველოში სააგენტო „სპუტნიკმა“ ჩაატარა.