კომპიუტერულმა ვირუსმა Petya-მ საქართველოს პარლამენტის IT სისტემას პრობლემები შეუქმნა. ვირუსის გამო დაიბლოკა პარლამენტარების სამსახურებრივი ელექტრონული ფოსტის მისამართები, რის გამოც დეპუტატები რამდენიმე დღის განმავლობაში ელფოსტებს ვერ ამოწმებდნენ.
როგორც imedinews-ს პარლამენტის პრესსამსახურში განუცხადეს, ამ დროისთვის ელექტრონულ ფოსტაზე წვდომა ისევ აღდგენილია, პარლამენტის IT სპეციალისტებმა კი გამაძლიერებელი ანტივირუსები ჩაწერეს.
პარლამენტარებმა დღეს ადმინისტრაციისგან მობილურებზე წერილიც მიიღეს.
"ძვირფასო პარლამენტის წევრებო და აპარატის თანამშრომლებო! გაცნობებთ, რომ ბოლო დღეებში კატასტროფულად იმატა ე.წ. Phishing "სატყუარა" მეილების რიცხვმა. მძიმე მდგომარეობაა რამდენიმე ქვეყანაში, რადგან გაჩერდა ინფორმაციული სისტემები. ვირუსები ვრცელდება ელ-წერილებით და ჩამოტვირთვებით სხვადასხვა საიტებიდან. შემდეგ ვირუსი შიდა ქსელის საშუალებით ვრცელდება მომხმარებლების კომპიუტერებზე და შესაძლოა მოხდეს ინფორმაციის სრული დაკარგვა. პარლამენტის აპარატი უსაფრთხოების ნორმებიდან გამომდინარე ვალდებულია გათიშოს გარე წერტილების სისტემა (შიდა სისტემა იმუშავებს), სანამ არ მოინახება პრობლემის გადაწყვეტის საშუალება. უმორჩილესად გთხოვთ, საეჭვო წერილები წაშალოთ მიღებისთანავე", - წერია დეპუტატებისთვის ადმინისტრაციის მიერ გაგზავნილ წერილში.
შინაგან საქმეთა მინისტრის მოადგილემ შალვა ხუციშვილმა პარლამენტისა და ფოთის პორტის ერთ-ერთ ტერმინალზე კომპიუტერული ვირუსის Petya-ს შემოღწევის შესახებ დღეს განმარტებები გააკეთა.
ხუციშვილის თქმით, კიბერთავდასხმა ფოთის პორტზე კი არა, პორტში მომუშავე ერთ-ერთ უცხოურ საერთაშორისო კომპანიაზე განხორციელდა. ამ კიბერშეტევის საქმეს კი იმ ქვეყნის სამსახურები იძიებენ, სადაც კომპანიის სათავო ოფისი მდებარეობს. ხოლო რაც შეეხება პარლამენტს, ხუციშვილი ამბობს, რომ შსს-ს სპეციალისტები პარლამენტში იმყოფებიან და ადგილზე სწავლობენ პრობლემის არსს. ამასთან გამოძიება ჯერ დაწყებული არ არის.
ევროპის ქვეყნები და აშშ-ის რამდენიმე შტატი კიდევ ერთი კომპიუტერული ვირუსის კიბერშეტევის მსხვერპლნი გახდნენ. ვირუსმა Petya-მ ესტონეთის, პოლონეთის, უკრაინის, საფრანგეთის, დანიის, რუსეთისა და პენსილვანიის შტატში კომპიუტერულ სისტემებში შეაღწია და გათიშა.
წყარო - imedinews.ge
Comments
Post a Comment
მადლობა კომენტარისთვის! | TSJ GROUP Tech |